Rahden (WB). Zur 60. Wiederkehr des Kriegsendes hat Elfriede Sudbrink »Erinnerungen ut miene Kinnertiet nor twäiten Weltkrieg« veröffentlicht. Heute geht es um »Olle Sün'n bekin'n«. Elfriede Sudbrink aus Kleinendorf schreibt auf Platt.
Olle Sün'n bekin'n bevoh däi groute Dag van'ne Konfirmation upp uss Konfirmanden tou kamm, gaff ett noh un annert Ereignis. Ett wass doumoals Moude, dat man denn Dag voher, dat wass däi Sünnoamd, toure Beichte güng. Ohne däi Beichte, dat wür uck bi olle Lüüe sou, dröffte man nicht toun Oammoahl goahn. Däi Pastor harre us nu mett upp'n Wegg geemm, moal oaber use Leben noh tou denken. Doa würn uss sicher äinige Sün'n infall'n, däi wi beichten kön'n. Wi kräigen olle un schlechtet Geweet'n, wer wüsste wecke Sün'n däi Grötsten würn? Van däi veel'n lütken Sün'n föll'n ain genou in. Ick fröi Mama, ob dat un dat woll'ne Sünde wesen wass? Säi mende, ick schull man käine Angst häm'n, sowiet säi denken könn, harre ick doch käine Sün'n begoahn. Däi lütken Sün'n, däi ick maket harre, würn mi van'n lieben Gott längs vogeem. Ick wass dou beruhigt un söig denn Dag gouen Mouts in'ne Möite. Tou däi Beichte dröffte man, weil dat sou feierlich wass, blous in schwat goahn. Wi Konfirmanden kön'n doarümme toun ersten Moal use Konfirmationstüch antäih'n. Olle würn gespannt, watt däi Annern anne han'n. Däi Jung'ns maken sick doa nix ut, däi wass dat egal. Wi Lüüt'ns würn doch un beet'n eitel un schiel'n ganz affgünstig noh däi, woa wie mend'n, dat säi un feineret Kleed anne han'n. Ick wass oaber mett mien Kleed ganz toufriee. Däi Beichte wass foh uss Konfirmanden nu doch watt Besonderes. Wi han'n van use Öllern lehrt, wenn man tou Beichte güng un uck toun Oammoahl, sick erst däi Föite wasken mösste. Düsse Sitte kam sicher doaher, wi ett in'ne Bibel stünd, dat Jesus dat uck so maket harre. Wi Jesus mett siene Jünger dat Oammoahl noahm hätt, hätt häi säi erst olle däi Föite wusken. In äin langen Gebet dön wi Konfirmanden use Sün'n bekin'n. Oss däi Pastor säi uss in Namen Gottes vogeem dö, wass äin doch ganz feierlick tou Moute. Ett kam äin wi so'n heiliget Vospreeken voh un man wass doanoh doch ziemlich still. Wi würn nu olle richtig upp use Konfirmation vobereit't. Oaber un lütken Zweifel bläif doch, ob dat woll olle so woahr wass. Das Buch »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« in Rahden oder direkt bei Elfriede Sudbrink unter Tel. 0 57 71/30 76.
Drucken