Rahden (WB). Zur 60. Wiederkehr des Kriegsendes hat Elfriede Sudbrink »Erinnerungen ut miene Kinnertiet no'n twäiten Weltkrieg« veröffentlicht. Heute geht es um »Angst vor'e Prüfung«. Elfriede Sudbrink aus Kleinendorf schreibt auf Platt.
»Däi Termin van däi Prüfung kam jümmer nöiger, ett wass däi Sönndag vor'e Konfirmation. Vandage häit dat: »Vorstellung der Konfirmanden.« Oaber däi Name »Prüfung« dröip denn Nagel doumoals beeter upp'n Kopp. Wi Konfirmanden söigen düssen Dag mett bangen Hate inne Möite. Jeder harre Angst doafoh, ett hetere jümmer, wenn man nich olles upp'e Prüfung könn, wull däi Pastor äin nich konfirmiern. Olles mösste man utwennig upp seggen kön'n, denn ganzen Katechismus mett olle Artikels und doatou däi Erklärungen. Däi veel'n Leear ut'n Gesangbouke, un ganze Riege Sprüche ut'e Bibel, sogoar äinige Kapitels un voh oll'n däi taihn Gebote mett däi Erklärungen. Ick harre voh däi Prüfung uck richtig Angst un wass jeden Dag feste an lern'n. Pastor Steinmann wass ganz strenge, wi Lüüt'ns gäiben uss ole Mühe un lern'n uck fliedig. Oaber däi Jung'ns dön öhne denn Gefall'n nich olle. Steinmann könn denn ganz vogrellt wern, wenn häi sick oawere Jungens ärgern mösste. Häi löit denn wecke nohsitt'n un namm'se mett noh Hus. Däi mössten so lange doa bliem, bett dat säi ühre Sprüche könn. Däi Pastor drohre däi Jungens, dat häi se nich konfirmiern wull, däi kräigen ett mett'e Angst un föngen dou doch an tou lern'n. Wenn wi Ünericht han'n, könn doch äinige Jugens ühre Uppgam'n uppseggen. Däi Pastor söggte sick van'ne Konfirmanden extra wecke ut, wo häi wüsste, dat säi uck lern'n dön, ümme upp'e Prüfung watt upp tou seggen. Ick wass uck doabie. Ick schull dat lange Kapitel ut'e Bibel Korinther 1, Kapitel 13, Vers 1-13 utwennig lern'n. Dat wass nu doch un würklich langet Stücke. Dag foh Dag wass ick an lern'n, dat würn jo äinige Verse. Mama mösste mi dat jümmer wia affhörn. Säi mende, dat früher däi Konfirmanden ett bi denn Pastor Rohlfing, wo säi bi konfirmiert wass, noh veel leeger hatt han'n. Däi wass jümmer mett'n Stock dür'e Riegen goahn und däi Jungens han'n sick Böiker achter inne Böksens steeken, doamett säi däi Schleege nich so spürt han'n. Joa, man mott doch seggen, däi Tieen häbb sick vandage doch mächtig ännert.« »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« in Rahden oder bei Elfriede Sudbrink, Tel. 0 57 71/30 76.
Drucken