Elfriede Sudbrink aus Kleinendorf erzählt auf Platt
Rahden (WB). Zur 60. Wiederkehr des Kriegsendes hat Elfriede Sudbrink »Erinnerungen ut miene Kinnertiet in twäiten Weltkrieg« veröffentlicht. Heute geht es um »Mett Kuffer vull Speck noh Duisburg«. Elfriede Sudbrink aus Kleinendorf schreibt auf Platt.
Däi Kerls ut Castrop-Rauxel hann goue Beziehungen tou äinige Firmen in Ruhrpott. Upp nomalen Wege wure kaum no watt vokofft. Wer nu so'n beet'n raffiniert wass un ett doun möchte, satt boum upp'e. Wi söigen, dat düsse Kerls nich bange würn, oss erstes wull'n säi uss denn Kupferdroaht fo däi Leitung besorgen. Däi Hauptmacker, sien Name wass Ortmann, bestünd dooupp, dat erst däi Fettsaken van däi Lüüe lewert wern mößten, süss löiten sick däi Firmen upp nix in. Papa see däi Lüüe olle Beschäid, jeder bröchte nu so gout häi könn, no uss watt her. Dräi groute Kuffers, vull mett Speck, Wurst, Schinken und Bottern, würn touhoupe kom. Wecke hann sogor erst un Schwin schlacht. Papa schull dat nu no äine Firma in Duisburg vomittel'n. Wi datt nu anfangen? fröigen wi uss olle. Ett wass voboarn un groute Strafe gaff ett, wenn säi äin bi so'ne Hamsteräi packen dön. Upp'e Bahnhöwe un in'ne Züge wure olles kontrolliert. Uck däi arm'n Frouenslüüe, däi upp Land föhrn un sick un beet'n touhoupe hamstert hann, wure faken olles wia affnoahm. Däi Lüüe hier van use Ecke trouen Papa dat oss äinzigsten tou, däi Kuffervull's häile in Duisburg afftou lewern. Papa wass jo jüsst nich bange, oaber mett souveel Speck un Wurst tou reisen, makere öhne doch un beet'n Angst. Papa kam upp däi Idee, däi Kuffers äinfach upp'n Bahnhoff upp tou geem. Oss Inhalt hätt häi Altkleider angeem. Häi ess dou un Dag later mett'n Zug no Duisburg föhrt. Oss Papa doa ankam, würn siene Kujffers ukk oll doa. Häi hätt säi in Empfang noahm un no däi Firma, däi denn Kupferdroaht lewern wull, henn broacht. Ett ess olles ohne Kontrolle oawere Bühne goahn. Wi in'ne Huse un ick däi annern Lüüe häbbt oaber groute Angst utstoahn, wenn dat schäiwe goahn wass, würn olle drann wesen. Olle würn frouh, oss Papa wia in Huse wass. Jetz luern wi, ob däi Firma uck Wort höllt un däi Droaht lewert wure? Ett schull nich lange durn, dou föhre un Lsatwagen bi uss upp'n Hoff, vull ladt met groute Rull'ns Kupferdrohat un no so ollehand annern Kroam. Wi könn' doch däi Kerls ut'n Kohlpott trouen, säi hann uss ühr Wort geem un ett houl'n. Das Werk »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« oder bei Elfriede Sudbrink unter der Telefonnummer 0 57 71/30 76.
Drucken