Rahden (WB). Zur 60. Wiederkehr des Kriegsendes hat Hobbyautorin Elfriede Sudbrink »Erinnerungen in twäiten Weltkrieg« veröffentlicht. Heute Folge geht es um »Däi näie Anfang ess schwoar«. Hobbyautorin Elfriede Sudbrink aus Kleinendorf.
Däi Winter 1945-46 wass koult un dure lange. Gretchen und Hans würn no jümmer bis uss. Oss säi van ühre Hochtiet trügge käim, han'n wi fo ühr, van däi lüttken Kamans, ne' lüttke Wohnung trechte maket. Säi könn'n nu in äine Kaman touhoupe schloapen und däi annern wass ühre Stoam. Däi Jürgen wass glücklich, dat häi nu uck un Papa harre. Däi Hans güng mett denn Jungen so gout ümme, oss wenn't sien äigen Kiend wür. Jürgen wass sess Joahr un ett kam däi Tiet dat häi no Schoule mösste. Weil dat in Buer unmöglich wass, ess däi Junge erst 'ne Tietlang no Wiehe in'ne Schoule goahn. Oss ett langsam Frühling wure, sind Hans un Gretchen wia no Buer goahn. Säi wun'n sick ut däi Trümmer van ührn Huse un paar Zimmer trechte bouen, dat hätt denn ganzen Sommer durt. Tüskendür, wenn't bi uss veel Arbeit gaff, in'ne Heiahn un Roggenahn, sind däi Bein wia bi uss wesen un häbbt doabi hullpen. Säi dön dat oll alleene ümme dat Eeten un säi kräigen uck wia van »Ollen« gout watt mett. Oss ett Herwst wure, han'n Hans un Gretchen un lüttket Hus mett twäi Zimemr förig bouet. Nu könn' Gretchen siene Öllern, däi no jümmer in'ne Nöichte van Magdeburg bi Vowandte würn, endlich trügge kom. Mett Peard un Wagen häbbt däi denn langen Wegg no Buer maket. Gretchen sien Vadder harre un künstlicket Bäin un könn blous mett Krücken loupen. Viele Evakuierte güngen, wenn ett möglich wass, in ühre Heimat trügge. In'ne Schoule makere sick dat uck bemerkbar, äinige Kinner würn mett Moal nich mehr doa. Ick harre upp mien Schoulweg uck oll van wecke Affschäid noahm, 'ne Tietlang häbb wi us no Bräiwe schreem, oaber dat schlöip uck so langsam in. Hans harre in Buer upp äin Werk Arbeit fun'n, ett wass nu endgültig, dat däi in Buer bläim. Uss hätt dat ganze leid doan. Oawer dräi Joahr sind Gretchen un Jürgen bi uss wesen. Mama hätt jümmer 'ne groute Hüllpe van Gretchen hatt, in oll'n Saken hätt ett Mama tou Siete stoahn. Däi Jürgen was wi so'n lüttken Brouer fo mi wesen. Fo mi föng nu uck 'ne annere Tiet an, nu mösste ick Mama ollerwärts bi hellpen, süss harre ick mi jümmer achter Gretchen vodrücken könnt. Das Werk »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« in Rahden oder direkt bei Hobbyautorin Elfriede Sudbrink unter Tel. 0 57 71/30 76.
Drucken