Rahden (WB). Zur 60. Wiederkehr des Kriegsendes hat Hobbyautorin Elfriede Sudbrink »Erinnerungen ut miene Kinnertiet in twäiten Weltkrieg« veröffentlicht. In der heutigen Folge geht es um »Olles ligg in Trümmer«. Hobbyautorin Elfriede Sudbrink aus Kleinendorf schreibt auf Platt.
Gretchen, däi evakuierten Froue mett ührn Jungen, würn nu oll oawer dräi Joahr bi uss. Gretchen wass uck gespannt, wi ett woll in Buer, wo ett her kamm, ut söig? Oaber ett wass jo boule nich möglich, doa henn tou kom. Züge van Roahn föhrn nich, däi Kanalbrüggen was däi lästen Kriegsdage no van däi Dützken sprenget wurn. Ett hätt dou moal glücket, dat Gretchen van Roahn ut mett äin, mett' so'n lütken Lastwagen, däi in Richtung Dortmund föhre, mett kom ess. Ünnerweges ess dat Auto kaputt liggen bleem. Upp Ümmewegen ess Gretchen dou doch touläste no Buer henn kom. Van sien Hus hätt ett blous no un grout'n Trümmerhoupen vofun'n. Uck däi Hüser an däi Stroate sind olle kaputt wesen. Gretchen hätt käine Bekannte wia säihn, däi würn genou wi ett, uck upp Land evakuiert. Schwoarn Hat'ns hätt Gretchen sick upp'n Trüggewegg maket. Ett ess dou mett'n Zug bett no Löhne kom un van doa ut tou Foute lous goahn. Koat no Lübbcke hätt ett bi äin Buern oawernacht. Doa mösste Gretchen in Kouhstall vor'e Kaihe upp 'ne Klam' Strouh schloapen. Joa, so'ne Buern gaff ett uck no, wo man so'n Quatier kräig. Gretchen hätt doa lange van kürt, dat dat un grout'n Buer wesen wass un bestimmt no un annern Platz hatt harre. Denn annern Dag kamm Gretchen total kaputt un mett groute Bloasen an'ne Föite, bi uss an. Ett wass so trourig un wüsste nich, wi dat Leben fo ett wita goahn schull. Oaber däi Hans namm ett in Arm und tröstete ett: »Sei nicht traurig, wir werden das schon schaffen und bauen uns ein Haus wieder auf.« In Herwst sind däi bein no Buer goahn un häbbt sick doa 'ne lütke Brerrbude uppbouet, doamett säi 'ne Ünnerkunft han'n, wenn säi doa anfangen wull'n tou bouen. In Winter sind säi oaber wia bi uss wesen, ett wass in däi Bude äinfach tou koult. Intüsken häbbt »Hänsel un Gretel« Hochtiet houl'n. Dat wür uck un armseliget Fest. Olles watt däi bein toun Leben bruken, häbbt säi van uss kreegen. Hans hätt Papa sien schwat'n Anzug antoagen, vo Gretchen han'n wi Stoff fo'n schwatet Kleed hamstert, dat hätt ett sülbes naihet. Gretchen wass oll in Vorrut no Buer föhrt un bi Bekannte fo'n paar Dage ünnerkom. Mama hätt dou fo Bottern un Bloumstrusk fo Hans besorget. Häi ess dou tou denn Hochtietsdag mett denn Strusk achteran föhrt. Das Werk »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« in Rahden oder direkt bei Hobbyautorin Elfriede Sudbrink unter Tel. 0 57 71/30 76.
Drucken