Rahden (WB). Zur 60. Wiederkehr des Kriegsendes hat Elfriede Sudbrink »Erinnerungen ut miene Kinnertiet in twäiten Weltkrieg« veröffentlicht. Heute geht es um »Papa sien Kriegskamerad, Teil 2«. Hobbyautorin Elfriede Sudbrink aus Kleinendorf schreibt auf Platt.
Äines Dages, ett wass Anfang Juli 1945, bröchte däi Bräiftreeger un Bräif an Papa. Oss häi denn oapen makere, troure häi sien' Ougen nich, däi Bräif kamm von sien Kriegskamerad Bressert. Mett Fraide läis Papa, dat däi uck wia inne Hiemat bi siene Familie wass. Upp'n Rückzug wass häi in englische Gefangenschaft geroan und no koater Tiet entloaten wurn. Heinrich Bressert wohnde in Schledehausen bi Osnabrück, häi wass van Beruf Bildhauer und Steinmetz. Äinmoal, tou Wiehnachten harre Papa uss un Paket schicket, doa wass un wundervollet Broutteller fo Mama un fo mi un Kerzenhalter inne. Dat harre däi Bressert ganz kunstvoll ut Holt schnitzt, dat giff ett vandage, no 60 Johr no bi uss. Ett dure nich lange, dou kamm däi ganze Familie Bressert tou Besuch no uss. Dat gaff velichte un Wiedersehn mett däi bein ehemaligen Kameraden. Dat Votell'n namm käin Enne. Jede Begebenheit, däi säi touhoupe belebet han'n harre Bressert olle no in Koppe. Papa harre oll so manchet Däil vogeet'n, oaber däi Bressert könn sick no an so Veeles erinnern, denn föllt Papa dat uck wia inn. Sogor däi Doatum's wüsste sien Kamerad no, häi fröig Papa: »Weißt du noch Willi, wo wir zu dem Zeitpunkt waren?« Wi mössten uss wunnern, dat häi dat olle behoul'n harre. Bi dat Votell'n kamm uck so manchen Streich, denn däi bein touhoupe uthecket han'n, toun Vorschin, ett gaff jedenfalls un masse tou lachen. Bresserts han'n twäi Lüüt'ns, däi würn in mien Öller, wi vostün'n uss glieks gout. Säi gäim nich tou un bekürn mi, dat ick säi in'ne Ferien beseuken schull. Oss däi Sommerferien anföngen, häbbe ick use sou lange ploaget, bett säi ihr Joawort gäim un ick no Bressert's henn dröffte. Ett wass dat erste Moal, dat ick inne Ferien voreisen könn un wass ganz glücklich. Oaber Mama mende: »Pass man upp, dat du käin Heimwäih krigg's, so lange bis du no nie van Huse wege wesen.« Joa, twäi Weeken schull mien Urlaub bi Bressert's durn. Ick wass ganz gespannt un könn däi Tiet gor nich affteum, dat ett lous güng. Das Werk »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« oder bei Elfriede Sudbrink unter der Telefonnummer 0 57 71/30 76.
Drucken