Elfriede Sudbrink aus Kleinendorf erzählt auf Platt
Rahden (WB). Zur 60. Wiederkehr des Kriegsendes hat Elfriede Sudbrink »Erinnerungen ut miene Kinnertiet in twäiten Weltkrieg« veröffentlicht. Heute geht es um »Papa siene Heimkehr, Teil 3«. Elfriede Sudbrink aus Kleinendorf schreibt auf Platt.
Nu wass Papa wia tou Hus, wi kön'n dat äigentlich olle no nich begriepen. Opa wass uck ganz frouh, häi see oaber doch: »Och, wenn dat use Mutter no belebet harre, dat Willi häile un'n Kriege komm' ess.« Oma wass nu oll oawer acht Weeken doute, watt harre säi sick woll oawer fraiet, dat beide Jungen's wia tou Hus würn. Onkel August wass jo in Gefangenschaft, oaber ett güng öhne jo doa gout. Nu mösste Papa sick in'n äigen Hus vosteeken. Dat wass gornich sou äinfach, dat doa käiner achter kamm. Bi uss güngen däi Pol'n un Serben ut un inn. Sogar use Pole Franz wass doa oll achter kom': »Ich weiß, Willi wieder da, keine Angst, ich nix sagen«, see häi tou Mama. Mama hätt sick mett miene annern Onkels beroan, watt nu woll tou maken wass? Säi sind tou denn Schluss kom', dat ett woll dat Beste wür, Papa ers moal oss krank tou mell'n. Mama hätt dou bei Dr. Schäfer in Roahn 'ne Krankmeldung fo Papa besorget, doamett ess säi nor'e englischen Kommandantur goahn. Däi dützken Dolmetscherin, dat wass 'ne Vowandte von Dr. Schäfer, hätt dat dou denn Kommandanten vodroagen. Mama harre däi voher extra 'ne Mettwurst mett noahm, doamett säi un gouet Wort bi'n Kommandaten inleggen dö. Däi hätt ühr dat glöfft, dat Papa so krank wass un doarümme nich in Gefangenschaft goahn könn. Häi hätt dou un Ouge tou drücket un fö Papa däi Entlassungspapiere utstellt. Uss föllt olle 'ne Last van Hate, Papa was fräi. Tain Dage harre häi sich vosteeken mösst un jüsst an denn Dag, denn 8. Mai, wo däi Krieg tou enne wass, harre häi siene Entlassung kreegen und brukere nich in Gefangenschaft. Papa könn nu ut'e Kaman harrut, häi güng oss erstet ümme't Hus tou, ett wass jo boule un Johr her, datt häi upp Urlaub wesen wass. Papa könn ett sülber uck woll nich begriepen, dat fo öhne un uck fo Dützkland endlich däi Krieg tou Enne wass. Use Norbers, oaber uck olle Lüüe, staun'n velichte, oss säi söigen, dat Papa wia doa wass. Jeder wull nu weet'n, wi Papa dat förig broacht harre, dat häi mett Moal in Huse wür. Nu güng dat groute Votell'n lous. Olle häbbt man lüstert, wi dat tou goahn ess un watt Papa belebet hätt, ümme no siene Heimat trügge tou kom'm. Das Werk »Erinnerungen ut miene Kinnertied in twäiten Weltkrieg« gibt es in der Buchhandlung »Das Buch« oder direkt bei der Hobbyautorin Elfriede Sudbrink unter der Telefonnummer 0 57 71/30 76.
Drucken