Rahden (WB). Anlässlich der 60. Wiederkehr des Kriegsendes hat Elfriede Sudbrink »Erinnerungen ut miene Kinnertied in twäiten Weltkrieg« veröffentlicht. Sie schildert auf Platt, wie sie als Kind diese Zeit erlebt hat. Heute geht es um »Affschäid van Oma/Teil 7«. Elfriede Sudbrink, Hobbyautorin aus Kleinendorf.
Ett güng nu upp denn lästen Wegg for Oma. Os erste mössen wi Enkelkinner achtern Sark hergoahn, dat wass Erna, Ewald, Gerhard, Artur un ick. Mien Cousenk Heinz wass oll in Kriege un könn nich doabie sien. Doanoh kam Opa, Mama un Tante, ett kam genau doa upp an, wer touerste oawere Deel güng. Siemas Mama, oss nöichste Norber, harre däi Pflicht, däi annern Vowandten, olle nor'e Riege ut'e Stoam un Kaman upptouroupen. Säi mösste gout upppassen, dat ühr käin Fehler passiere, dat vogäiten däi Lüüe so lichte nich, wenn un Anner touerste rut goahn wass. Langsam settere sick däi Douenwagen in Bewegung, ett wass un langen Wegg, ganz bett no'n Roahner Kerkhoff. Ett würn veel Lüüe kom, däi Oma upp ührn lästen Gang mett güngen. Touerste güng olles gout, oaber oss wi koat voh Hellers würn, söigen wi, dat an Himmel Bombervobände in Anflug würn. Ett dure nich lange, dat dützke Jägers uppdöiken un ett tou Luftkämpfe kam. Däi Lüüe würn meist mett Rad achtern Douenwagen her schoam, säi söigen tou, dat säi schwanke noh Hus käim. Koat voh Hellers stün'n groute Lindenböime. Dullweber höllt däi Peear an, oss häi däi erreicht harre un wi Annern söigten uck Schutz ünnere Böime, Mett groute Angst käiken wi non Himmel. Ungefähr 'ne halbe Stunne han'n däi Luftkämpfe durt, ett wass oaber, Gott sei Dank, nix passiert. Oss ett dou wita güng, würn däi meisten Lüüe achtern Douenwagen wege. Upp'n Kerkhoff stün'n blous noh däi Ollernöichsten an Grabe. Däi Pastor harre dat Vaterunser beet un dat Sark mett Oma wass jüst in'ne Ern, dou töigen oll wia Bombers harran. Wi mösten schwanke Affschäid von Oma nehm. Use Vowandten güngen van Kerhoff glieks noh Hus. Säi han'n äigentlick wia mett noh uss trügge kom schullt, oaber nu wass jeder frouh, wia in'n Huse tou sien. Ick könn nu upp'n Trüggewege mett'e Kutske noh Hus föhrn. Däi Affschäid von Oma wass uss olle schwoar fall'n. Ick würde säi uck noh faken vomissen, säi wass fo mi jümmer 'ne goue Oma wesen. In Huse ankom'n, han'n däi Norbers oll olles wia upp'e Riege maket. Däi Stoam un Kamans würn wia inrühmt und däi Kaffee un Kouken stünd upp'n Diske. Das Buch gibt es in der Buchhandlung »Das Buch« in Rahden oder bei Elfriede Sudbrink, Tel. 0 57 71/30 76.
Drucken