Rahden (WB). Anlässlich der 60. Wiederkehr des Kriegsendes hat Elfriede Sudbrink ihr Buch »Erinnerungen ut miene Kinnertied in twäiten Weltkrieg« veröffentlicht. Sie schildert in plattdeutscher Sprache, wie sie als Kind die Zeit während des Krieges erlebt hat. In der heutigen Folge geht es um »Angst fo Tieffliegers«. Elfriede Sudbrink, Hobbyautorin aus Kleinendorf.
Je länger däi Krieg dure, desto leeger wurn in'ne Heimat däi Angriffe van däi Englischen Tieffliegers. Oss Ziele söigten säi sick vo oll'n däi Isenbahn ut un schöiten däi Lokomotiven van däi Züge kaputt. Nu wass ett ganz leege, dat wi uck so don'ne an'ne Bahn wohn'n. Jeden Dag rull'n lange Güterzüge bi uss vobi, ett würn nich blous normale Güter däi doa transportiert wurn, näi, vo oll'n Militärzüge, meist lange Panzerzüge. An'ne Lokomotiven stünt in grout'n Boukstahm schreem: »Räder müssen rollen für den Sieg!« Däi Lüüe han'n doa uck ein Reim tou dichtet: »Naziköpfe nach dem Krieg«; orer: »Kinderwagen für den nächsten Krieg.« An däi Waggon's wass so'ne schwate Figur an moalt, dorünner stünt grout »Kohlenklau« schreem. Däi schwate Kerl harre un Sack met Köhle upp'n Nacken, doa schull'n däi Lüüe mett bange maket wern. In'ne Städte gaff ett nich veel mehr tou brenn'n, denn güngen däi Lüüe upp'e Bahnhöwe un klauen Köhle ut'e Bahnwaggon's. Düsse »Kohlklau-Kerl« schull säi nu affschrecken, oaber ett störe sick doa woll käin Minske an. Däi langen Güterzüge, oaber touläste uck däi Person'nzüge, han'n achter upp'n lästen Wagen Soldoaten mett 'ne Flack bi sick, wenn däi Zug van Tieffliegers angreepen wure, schull'n säi däi Fliegers affschäit'n, un denn Zug voteidigen. Vo düsse Tieffliegers han'n wi groute Angst. Oss Papa moal upp Urlaub kamm, harre häi in Gestringen so'n Tieffliegerangriff upp'n Zug mett maket. Toun Glücke wass denn Lüüen nix passiert, däi würn olle in'ne Büske un Graams flücht't, oaber däi Lokomotive wass kaputt schoat'n würn. Stun'nlang harre'et durt, dat 'ne annere Lok' van Roahner Bahnhoff kom' wass un harre denn Zug affschleepet. Oss Papa bi uss ankamm, wass häi no ganz uppgeregt un see: »In'ne Heimat, kott vore Husdürn, mott man Angst häm'n, dat man doutschoat'n wett.« Wi würn olle dankbar, dat Papa nix passiert wass. Das Buch »Erinnerungen ut miene Kinnertied in twäiten Weltkrieg« kann man in der Buchhandlung »Das Buch« in Rahden oder bei Elfriede Sudbrink, Tel. 0 57 71/30 76, erhalten.
Drucken